Fotti Cavalli è unu di vintuquattru fotti chi fannu patti du Campu Trinceratu di Missina, fabbricatu du Statu Maggiori dill'Eseccitu tra u 1883 e u 1902, pi difenniri na patti du tirritoriu meridiunali da chiddi chi putiunu essiri sbarchi francisi, chi n'ta ddu periutu erinu mpignati n'ta na pulitica espansionistica coloniali vessu a Tunisia. St'opira futtificata, fu capaci di risistiri o terrimotu du 1908 e di passari i du guerri mundiali senza puttari dannu, a Marina Militari a lassau n'to 1954 e così pi tantu tempu ristau bannunata. 

Dighiaratu beni storicu-artisticu, u fotti Cavalli n'ta l'annu 2000 fu datu in cuncissioni dimaniali  all'Associazioni “Comunità Zancle”-ONLUS chi u sistimau e u mintiu a disposizioni da populazioni. U travagghiu dill'Associazioni ONLUS, chi veni fattu picchì si voli ritunnari a Missina un pezzu i storia scuddata e riaviri posti artistici e culturali, cosa chi sta dannu i so risuttati.

Contru a tuttu chiddu chi ni putiumu spittari, Fotti Cavalli ora è un postu chi veni visitatu da scoli, famigghi e carusi chi appatteninu a varii associazioni giovanili e paisani disidirusi di riaviri un patrimoniu chi ppatteni a na città chi piddiu tutta a so storia nto terrimotu du 1908 e disidirusa di riaviri l'immagini di dda dignità chi ci spetta pu so passatu e pa so posizioni climatica e giografica n'to Meditirranio. N'ta piazza d'armi du fotti ci minteru chiddu chi n'ta secunna guerra mundiali era u chiù ranni cannuni italianu (16 tunnillati pi 10 metri di lugghizza), regalatu da lu Ministeru da Difesa e dighiaratu Munumentu e Caduti di Tutti i Guerri.

U Museu Storicu du Fotti Cavalli, unicu di stu tipu n'ta tutta a pruvincia i Missina, cu ddi 2500 cristiani l'annu chi u vannu a visitari, divintau un postu mportanti pi turisti e i scoli di tutta Missina. 

Tanta gente non sapi chi esistunu tanti strutturi militari, i chiù ssai praticamenti sani, chi sunnu tistimonianza du nostru passatu battaglieru. Si sintia assai a nicissità di difenniri Missina, picchì tannu iera na città assai mpurtanti, passaggiu obbrigatoriu tra a Sicilia e u cuntinenti, n'ta na pusizioni piddaveru strateggica tantu chi ierinu chiù d'unu i putenti chi l'avissiru vulutu. Missina, pecciò comu l'autri e fossi puru chiù ssai iavi tanti tracci di strutturi architettonici di tipu militari, chi appatteninu a varii epuchi, a cuminciari dall'età classica finu a fini dill'ottucentu: sicuramenti è un patrimoniu architettonicu ancora mpunenti, ma puttroppu minazzatu dall'edilizia chi crisci senza criteriu. Fotti Cavalli è ancora u stissu di comu iera n'to luntanu '800 quannu u so doviri iera chiddu di difenniri. Primu di fotti a Sud, iavia a vista supa o mari Jonio e ancora aoi è unu di posti  panoramici chiù spittaculari da città i Missina.

Pecciò iera a fottificazioni misa a difesa da potta meridionali du Strittu, pi controllari tutti chiddi chi rivaunu sia du iautu chi du basciu Ionio. Praticamente si trova in linia d'aria quasi di facci a città di Riggiu. U fabbricatu è in bonu statu, duranti a secunna guerra mondiali non appi danni, e a fini da guerra ristau nchiusu, duranti a costruzioni di l'autustrata Me-Ct fu usatu comu dipositu di esplosiu e quannu fineru i travagghi fu dannavota bannunatu. A so pianta è chidda classica a fomma di trapeziu, e c'è u fossatu chi ancora si mmanteni, a garitta supa a destra e a potta centrali a ponti levatoiu. È simmetrica e iavi du rampi una pi latu pi nchianari e piani chiù iauti a unni cerunu piazzati i torretti telimetriche d'acciaiu chi ora non ci su chiu. Sia a lugghizza supa a linia du rilievu, chi u terrapienu di cummattimentu sunnu chiù ranni rispettu a tutti l'autri battarii, picchì avia chiù postazioni d'artiglieria e tra una e l'autra c'erinu i dipositi di munizioni. Comu a Munti Gallo/Cavalli sulu na para i battarii iannu 8 piazzoli pi obici e du piattafommi semicircolari n'te lati pi cannuni, chi si ponnu ancora vitiri, puru si n'ta sti anni foru fatti travaghi di pavimentazioni. Sulu i fotti Masotto e Petrazza ponnu vantari u stissu quantitativu di pustazioni. Puru u Fotti Cavalli, comu i n'ta tutti l'autri, subiu saccheggi, difatti spareru ringhieri, elevatori, scali e tuttu chiddu chi iera di ferru e si putia trasputtari.

Chiddi chi l'appiru in cuncissioni a picca a picca riputtaru u Fotti in boni condizioni, iapennilu finammenti a tutti chiddi chi u vonnu visitari e chi così ponnu apprizzari tutti i so patticulari.

U Fotti Cavalli è „Patrimoniu ill’umanità“